केन्द्रिय अस्पतालमै स्वास्थ्य बीमाको सेवा सुचारु हुने

काठमाडौं , असार ३२ 
नजिक स्वास्थ्य बीमाको सेवा केन्द्र नपुग्ने नागरिकका लागि सरकारले नजिकको केन्द्रिय सरकारी अस्पतालमै सेवा उपलब्ध गराउने भएको छ।

स्वास्थ्य तथा जनसंख्या मन्त्री प्रदीप पौडेलले बुधबार सामाजिक सञ्जालमार्फत जानकारी दिँदै नजिकै सेवा केन्द्र नभएका ठाउँमा नागरिकलाई अप्ठ्यारो नपरोस् भनेर यस्तो व्यवस्था गरिएको बताएका छन्।

स्वास्थ्य बीमा बोर्डले केही समयअघि निजी र सरकारी अस्पतालहरूमा रहेका सेवा केन्द्र हटाएर स्थानीय तहमै केन्द्रित गर्ने निर्णय गरेको थियो। तर, नजिक सेवा केन्द्र नभएका नागरिकले समस्या भोग्न थालेपछि मन्त्रालयले हस्तक्षेप गरेको हो।

मन्त्री पौडेलले भने, ‘‘सेवा लिन अप्ठ्यारो हुने ठाउँका नागरिकका लागि केन्द्रिय सरकारी अस्पतालमै सेवा जारी राख्ने व्यवस्था मिलाएका छौँ।’’

उनका अनुसार स्थानीय तहमा सेवा केन्द्र स्थापना र स्तरोन्नतिका लागि प्रदेश र स्थानीय सरकारसँग सहकार्य गर्ने योजना पनि बनाइएको छ।

मन्त्रालयले स्वास्थ्य बीमालाई व्यवस्थित गर्दै नागरिकको पहुँच बढाउन र कार्यक्रमको दिगोपना कायम राख्न सुझाव र सल्लाहलाई पनि स्वागत गर्ने जनाएको छ।